话说自从阿划叔做咗番薯邦大总管之后，番薯邦系国际嘅名声好似越黎越有power 咁喎！
谂番起十几年前去东方大国度旅行，嗰度啲人问：
“ 你地边度黎架？”
你答佢“ 番薯邦” ，嗰度啲人拧下拧下个头，话唔识，未听过。你话：“系小新个头壳顶上边啊！”
“ 哦，小新啊，知道知道！”
乜尼度啲人冇读过地理嘅咩？！
到咗2014年，当时系拿鸡怖做番薯邦大总管，3月头，一架马航大飞机连人带机全部唔见咗，上天下海揾咗好多年，乜家伙都揾唔到。同年7月，又一架马航大飞机，系大鹅边境俾导弹射中，机同人全部芭比Q，尼个时候，番薯邦先至系国际间俾人地注意到。
2015年，外国报纸佬爆料，拿鸡怖搞一个大番薯发展有限公司，蚀咗几百个亿番薯币，但系佢嘅私人银行户口，无端端就多咗7亿美金，仲搞到一个银行家同一个番薯邦副检查师先后被杀。好嘢无一单，反而衰嘢就多箩箩。
污桶当政嘅年代，身为番薯子民，出国都唔敢表明身份，人地问：“ 你地边度黎架？”
“ 广州黎嘅！”
如果去到广州，就话：“ 香港黎嘅！”
尼三年，阿划叔同班大臣，除咗要将污桶、尤其系麻麻老妖同佢班朋党，系番薯邦积咗60几年、腐臭不堪嘅苏州屎，逐啲逐啲咁括，希望早啲可以括乾净；阿划叔仲要成日滚水渌脚咁，同啲大臣周围飞去人地嘅国家度招生意。原来阿划叔系外国好有人缘，除咗口碑好，人地对佢都好尊敬，唔怪得大家都赞阿划叔系番薯邦嘅最佳代言人，顶级sell 士( salesman)。
近日，第47届东盟峰会系番薯邦举办，作为东盟峰会主席嘅阿划叔同埋班大臣，表现出色得体。为期3日嘅峰会，除咗20几位世界领导人齐聚番薯邦，仲有世界银行、国际货币基金组织、国际劳工组织同埋国际足球联合会嘅负责人都出席部分会议；净系本地同埋外国报纸佬都两千几人，可想而知，番薯邦系国际社会嘅名声已今非昔比。
专家话：番薯邦嘅东盟峰会系今年全球经济嘅重大事件。
事实就系，番薯邦带头设定东盟议程、协调地区合作方向，系东方大国同埋阿咩li卡之间保持平衡对话。对生意佬黎讲，今年系最关键嘅，番薯邦将重点推动：区域绿色经济、可持续投资；跨境电商同数码互联互通；中小企业系区域供应链中嘅参与度等等。
当大多数番薯子民全力投入，要将经济提升，要将番薯邦块招牌擦到蜡蜡靓，搞屎棍包头党、冇油灯、麻花党同埋啲枪手政棍，唯恐天下不乱，日日系度吵娃人子弟学校礼堂租俾人地办宴会饮酒嘅课题。
经历咗污桶加上麻麻老妖总共60几年嘅恶政霸权统治，虽然已经彻底改朝换代，可惜有啲娃人已经患咗“ 被害妄想症”，日日谂住自己系被逼害嘅族群。包头党、冇油灯嘅党、麻花党就系睇中尼啲人最容易被人摆弄，只要随便整件宗教种族嘅嘢出黎，系大众媒体到乱炒一通，尼啲“ 被害妄想症” 群体就即刻被刺激到弹起，跟住麻花枪手闹阿划叔，闹乐吉党，仲成日都话要搞多一齣喜来登2。
都唔知点解尼啲人会咁钟意冇油灯同埋龟蛋兽相？冇油灯做咗8个月大总管，滥权贪污2亿3250万马币；龟蛋做咗14个月，反贪会系佢嘅马仔到就搜出1.7亿现金同埋16公斤金条。佢地成班骑哩怪大臣加埋包头党班底，全部头脑装草，冇啲啲墨水，乜都唔识做，净系识得攞粮银兼揾机会贪污，真系谂起都一肚火。
麻花党匿系污桶裤浪底60几年习惯咗做应声虫，习惯咗拾污桶朋党食净丢出黎嘅骨头，䟴䟴脚就可以食到脑满肠肥，所以乜都唔识。今时已经唔同往日，睇住阿划叔同班大臣做嘢，麻花坐住嗰官位但系唔肯学又唔合作，旧时就匿系污桶裤浪底闹乐吉党，而家就同埋包头党冇油灯做搞屎棍搞破坏，闹乐吉党反阿划叔反所有政策，真系下流贱格到冇得顶，影衰娃人一族。
睇到今日番薯邦系国际社会嘅提升，番薯邦举办东盟峰会嘅成功，平时最钟意当面瘀人地嘅阿咩li卡大统领，上台致词唔觉意讲咗一句：“ everything you touch turns to gold ”。
要番薯邦兴旺成功，需要全民嘅努力，千企唔好被啲奸人卑鄙无耻之徒挑拨离间，破坏社会和谐。国家好，人民就好，人民好，国家就一定好。只有人民共同维持社会的安稳，振兴国家，指日可待。
