2020年4月16日星期四

寓言又一则——今次真係玩大咗(粤语版)



话说老嘛嘛人虽然生得唔矮,但係个心胸就非常之狭窄,佢最憎人地成日赞阿划叔,尤其係阿划叔喺鬼佬国家到受欢迎程度胜过自己好多,真係谂起都嬲!

眨下眼距离五零九又就快两年,番薯民等住睇佢几时肯交番个大总管位俾阿划叔。老嘛嘛真係打死都唔制,私底下发誓,唔理用乜嘢手段,总然之就係死都唔会俾阿划叔坐到大总管嗰位。

老嘛嘛左谂右度,终於又俾佢谂咗条屎桥,就係由佢嘅一色人党夹埋污桶同怕死党,一齐另辟炉灶,实行搞个六国大封相,笼内鸡作反,将个朝廷翻转晒,踢走晒乐吉党啲大臣,等佢可以做番个一言堂主,咁先至称心所欲,更可以顺便布署下,等第日自己卖咗咸鸭蛋嗰阵时,自己个香炉趸就顺理成章接班做大总管。

讲起乐吉党哩班大臣,老嘛嘛条气就顶住顶住,因为自从五零九,啲番薯民同啲报纸佬成日喺度赞佢地做得嘢。番薯邦最叻嘅除咗老嘛嘛自认第一,边个仲敢胆认第二? 老嘛嘛嘅宗旨就係,如果边个又叻又做得嘢,一定唔可以俾佢留喺朝廷度。最啱就係成班食同瞓大臣,俾啲糖仔凼下,叫佢地跪又得趴又得,听教听话,更能够显示到自己係几咁叻。而污桶就最憎恨乐吉党,因为乐吉党时时都话要番薯邦成为番薯民嘅番薯邦,又话要平等、公正,担屎都唔准偷食; 偏偏污桶几十年嚟所奉行嘅就全部都係相反嘅,担屎唔只偷食,仲要连屎桶都偷埋去。

阿划叔同乐吉党求老嘛嘛继续做大总管,阿划叔应承唔再逼佢交棒,佢钟意做到几时都得,只要佢唔好同污桶同埋怕死党合作。老嘛嘛觉得好爽,自己真係叻到爆,整色整水就可以制住晒啲大臣,成个朝廷任佢指挥任佢玩。点知道一色人党其他成员早就同污桶怕死党夹埋一不做二不休,趁住新冠肺炎病毒入侵番薯邦,兵慌马乱嗰阵时,嗱嗱临夹硬霸占咗朝廷,一色人党嘅二当家冇油灯,立即坐上咗大总管嘅位。

朝廷陷入立立乱嘅局势,一色人党污桶怕死党员全部顾住争官位,番薯邦陷入冇王管状态,病毒有充足机会大展传染绝技。咁啱有成万千衣撕烂哄埋一堆,病毒开心爆棚,因为越多人病毒嘅力量就越强,只要入咗人体就可以开枝散叶,仲会变种,越变越劲。

等到冇油灯派完晒啲官位,肺炎病毒病患数目节节上升,日日都加百几二百个,总数千打千,冇油灯上电视宣布番薯民要匿埋喺屋企,除咗买粮食,唔可以出街周围贡,牙差将士们都要出埋嚟维持秩序。

俗语有话,新官上任三把火,咁就梗係要做番啲嘢先至似样。
首先就係污桶搞清洁大臣阿汗嘅老窦上电视,向番薯民示范饮暖水,话饮暖水可以预防肺炎病毒。番薯民真係俾哩个新任搞清洁大臣吓傻,点解佢讲啲嘢同网络嗰啲蚕虫师爷教嘅一样嘅?佢係清洁大臣嚟嘎喎!?

至於嗰个背叛咗阿划叔嘅蛀乸挞同埋爱滋吻过档去咗一色人党到,蛀乸挞做咗建筑土地大臣,佢谂点样表演下可以出位先?於是乎,蛀乸挞着晒全套防护衫上街表演消毒大戏。可怜医院嗰啲前线医护人员都唔够防护装备,要用好多层原子袋包头包手包脚嚟保护自己,番薯民睇到都心悒(ep)。蛀乸挞做下show 就嘥咗成套好贵嘅防护服,不然留番俾啲医护人员仲好啦!阴功!

跟住,怕死党嘅管女性、屋企、同埋社会发展嘅副大臣死地再拉,指责番薯邦铁鸟女侍应啲服装唔啱衣撕烂规矩;仲有前朝女大臣禁止细路女嫁俾啲麻甩佬条例都係唔啱,一定要恢复污桶朝代嗰阵时咁样先至啱,佢仲话细路女可以嫁俾麻甩佬都係好幸福嘅。仲叫番薯民疫情时期唔需要咁紧张咁惊死,应该听天由命,反正所有人始终都係会死嘅嘛,搞到番薯民要闹爆佢。

冇几耐,拿毒死地再拉又唔知乜嘢上身,教番薯邦啲女人係屋企要服从要有耐性,就算俾啲麻甩佬打到内伤,都要原谅佢地咁话。

接住落嚟,死地再拉嘅部门通过有面嘅书建议,人人匿埋喺屋企嘅时期,老婆喺屋企返工,要扮靓靓着返工衫,唔可以随随便便;如果老公唔识做家务,老婆要扮好似“ 多啦A梦”嗰把声向老公诈嗲,唔可以罯罯寻寻(ngam ngam cham cham) 同老公嗌交。

疫情严重,经济惨到痹,一色人党最高理事仲係大夫身份嘅摸虾殁罚屎提议,朝廷应该俾一色人党嘅同村子弟种大麻种哥冬叶,搞到大家都好兴奋,咁就可以帮助到经济好转。

仲有个污桶高级书院大臣螺拉泥得闲冇嘢做,唔去关心啲后生仔女喺啲咁艰难嘅日子点过,竟然去揾条唔知乜水同佢拍咗支广告,搞滴Tok兢赛。

好多番薯民俾班骑哩怪搞到忍唔住揼心口喊到fili啡咧,对住个天大叫 :“天啊!你大发慈悲救下我地番薯民啦!究竟番薯邦做咗啲乜嘢?要受啲咁嘅诅咒喎?”

老嘛嘛真係好叻,编咗咁大场戏,仲搞到衰收尾添!



没有评论:

发表评论